Gazetari italian, Biasin, është i sigurt se Kristjan Asllanin e pret ende një karrierë e madhe përpara. Mesfushori shqiptar do të largohet nga Interi në këtë verë, por pret ende emrin e ekipit të ri. Asllani ka kërkuar kohë duke mos u munduar të nxitohet pasi hapi i radhës për karrierën e tij do të jetë vendimtar.
Biasin shprehet se Asllani ka cilësitë për të bërë mirë në Itali dhe për të shprehur të gjitha aftësitë e tij në një ekip tjetër, jo me emrat e Interit në mesfushë.
“Nuk e di se ku do të shkojë Asllani, por do të bëjë shumë mirë. Në vitet e fundit është mbytur nga emra si Brozovic dhe Calhanoglu, lojtarë më të fortë dhe me më shumë eksperiencë. Mendoj se Asllani ka para një karrierë të shkëlqyer dhe kushdo e merr atë në ekip, do të bëjë një marrëveshje të shkëlqyer”, tha Biasin. /Elio Hajdari-Sport Ekspres/
