Vetëm pak orë kanë mbetur nga fillimi i ndeshjes mes Serbisë dhe Shqipërisë. Megjithatë para këtij takimi, atmosfera në Serbi është në kufijtë e së pabesueshmes. Përpara stadiumit nuk ka ende asnjë tifoz të mbledhur dhe duket si të jetë një përballje miqësore dhe jo me rëndësi të lartë, pa hyrë në aspektin historik dhe faktit që përballë tyre do të jetë Shqipëria.
Një prej mediave serbe ka bërë këtë raportim pak minuta më parë: “Edhe pse kanë mbetur pak më shumë se katër orë deri në fillimin e ndeshjes, për momentin nuk ka eufori. Sipas gazetarit tonë në vendngjarje, gjithçka është e qetë në rrugët e Leskovcit. Prania e një force të fortë policore është e dukshme. Pamjet e çuditshme në Leskovc, në rastin më të mirë….”
Pra deri tani gjërat po shkojnë sipas planeve të Serbisë. Ndeshja u dërgua në Leskovc pikërisht për një arsye të tillë, për të shmangur presionin e madh dhe ndonjë përplasje të mundshme dhe deri tani nuk ka ende tifozë serbë të grumbulluar. /Sport Ekspres/