Shqipëria është në duart e Simon Simonit! Vetëm 19-vjeç, por ky portier po rritet në Gjermani te Frankfurti. Aktualisht Simoni është pjesë e rëndësishme e U-21, teksa i ka filluar të gjitha takimet nga minuta e parë. Edhe pse pësoi një dëmtim që e la gjatë jashtë fushës së blertë, Simoni u kthye sërish si titullar.
Në një intervistë për emisionin “Koha Shtesë”, gardiani i dalë nga Dinamo priste një ftesë të Silvinjos për miqësoret e marsit dhe më pas të luajë ato pak shanse të mbetura, për të qenë pjesë e Europianit të Gjermanisë. (Videon e plot të emisionit e gjeni më poshtë)
“Të gjithë te ekipi im më kanë përgëzuar për suksesin e Shqipërisë. Edhe trajneri im më përgëzoi, më tha se Shqipëria është një ekip i fort. Të gjithë më kanë përgëzuar për arritjen e Shqipërisë, në fillim askush nuk e besoi.
Ftesa në Kombëtare? Të them të vërtetën, Kombëtarja është ëndërr. Po të aktivizohem në miqësore, mund të marrë edhe ftesën e Europianit. Unë jam akoma 19-vjeç, por portieri është ndryshe nga lojtarët e tjerë për shkrirjen brenda grupit. Pra ti mund ta nisësh më vonë dhe të jesh pjesë e rëndësishme e ekipit. Unë do bëj gjithçka që mundem, pjesa tjetër i takon trajnerit”, tha Simoni. /Sport Ekspres/
