Për herë të parë në histori, Federata e Futbollit do të organizojë një mbledhje të nivelit të lartë të UEFA-s për Qëndrueshmërinë Mjedisore dhe Përgjegjësinë Sociale (SES Community) në datat 28-30 tetor.
Kjo mbledhje do të mbahet në stadiumin “Air Albania” dhe do të marrin pjesë përfaqësues të 55 federatave europiane. Të gjithë pjesëmarrësit pritet të mbërrijnë pasditen e të hënës së 28 tetorit ku do të zhvillohet pjesa e parë e mbledhjes.
Presidenti i FSHF-së, Armand Duka, do të mbajë një fjalë përshëndetëse në nisje të mbledhjes së bashku me Drejtorin e UEFA-s për Qëndrueshmërinë Sociale dhe Mjedisore, Michele Uva. Të martën më 29 tetor mbledhja do të nisë në mëngjes në orën 9:00 dhe gjithçka do të përfundojë paraditen e të mërkurës.
Sipas agjendës së përcaktuar nga UEFA gjatë mbledhjes do të diskutohen disa pika të ndryshme që kanë të bëjnë me çështjet mjedisore dhe përgjegjësinë sociale.
Planifikimi, aplikimi dhe raportimi i strategjisë së përgjegjësisë sociale të federatave që përqendrohet në disa fusha kryesore si ndikimi mjedisor, ekonomia e qëndrueshme, shoqëria dhe përfshirja.
Gjithashtu, projektet e planifikuara për t’u zbatuar dhe projektet e së ardhmes do të jenë në qendër të vëmëndjes, me qëllimin e vetëm për ta bërë futbollin të aksesueshëm për të gjithë.
