Pas eleminimit nga Liga e Kampionëve, Atletikoja e Madridit është larguar edhe nga Kupa e Mbretit. Klubi kryeqytetas ka humbur me shifrat minimale 0-1 përballë Barcelonës, duke ndërprerë rrugëtimin në gjysmëfinale me rezultat të përgjithshëm 4-5. Simeone ka deklaruar pas ndeshjes se ky eleminimin nuk është për të kërkuar falje. Sipas trajnerit të Atletikos së Madridit, skuadra po zhvillon një sezon të mirë. Simeone ka zbuluar edhe bisedën që ka zhvilluar me lojtarët pas përfundimit të pjesës së parë të takimit.
“Ekipi ka garuar shumë mirë. Garuam shumë mirë në Ligën e Kampionëve, garuam shumë mirë në Kupën e Mbretit dhe po bëjmë mirë në La Liga. Nuk është diçka për të kërkuar falje. Mendoj për futbollin. Ndonjëherë e gjen veten në situata kur kundërshtari është superior. Çfarë i thashë lojtarëve pas pjesës së parë? I thashë që Barcelona na fali dhe na mbajti gjallë, sepse mund të kishin shënuar më shumë gola”, ka deklaruar Pablo Diego Simeone./Sport Ekspres/