Carlo Ancelotti ka qenë në skenën e madhe të futbollit për më shumë se dy dekada dhe gjatë karrierës së tij të pasur si trajner ka stërvitur një numër të madh lojtarësh, përfshirë ata që konsiderohen më të mirët në histori, ndaj kur lavdëron një lojtar, fjalët e tij sigurisht që kanë peshë.
Anceloti ka thënë fjalët më të mira për Valverden, duke e konsideruar si lojtarin më të kompletuar në botën e futbollit aktualisht. Valverde luan kryesisht në mesfushë, ka luajtur në krahun e djathtë të sulmit, ndërsa së fundmi për shkak të dëmtimit të Dani Carvajal është detyruar të luajë në krahun e djathtë të mbrojtjes.
“Valverde është një lojtar i kompletuar dhe shumë i rëndësishëm sepse mund të mbulojë shumë pozicione dhe bën gjithçka në mënyrë perfektë. Është shumë e vështirë të gjesh një krah të djathtë si ai dhe është shumë e komplikuar për mua të zgjedh pozicionin më të mirë për të. Duhet të zgjedhësh pozicionin e tij më të mirë për ekipin. Ai kurrë nuk më thotë se ku dëshiron të luajë dhe është ndoshta lojtari më i kompletuar në futboll për momentin, sepse ai mund të mbulojë shumë mirë të gjitha pozicionet e mundshme. Mund të luajë edhe si portier pa asnjë problem”, tha Anceloti. /Elio Hajdari-Sport Ekspres/
