Marash Kumbulla ka përfunduar huazimin e tij te Espanyoli dhe është rikthyer te Roma. Në gjysmën e dytë të sezonit në La Liga, mbrojtësi shqiptar ishte titullar i rregullt dhe dha një kontribut të rëndësishëm në arritjen e objektivit të madh të skuadrës: mbijetesa në elitën e futbollit spanjoll. Paraqitjet e tij ishin të qëndrueshme, me disiplinë taktike dhe qetësi në mbrojtje, duke u vlerësuar si një nga pikat e forta të prapavijës së Espanyolit.
Tashmë, Kumbulla është rikthyer te Roma dhe do të nisë përgatitjet për sezonin e ri nën drejtimin e trajnerit Gian Piero Gasperini. Ky i fundit ka shprehur dëshirën ta vëzhgojë nga afër gjatë ndeshjeve miqësore të verës, për të vlerësuar nëse mbrojtësi shqiptar mund të përshtatet në skemat dhe filozofinë e tij të lojës.
Aktualisht, Kumbulla vjen si alternativa e katërt në hierarkinë e mbrojtjes, por me paraqitje bindëse në fazën përgatitore, ai ka mundësinë të rrisë rolin e tij në skuadër dhe të luftojë për më shumë minuta në sezonin e ri në Serie A. /Elio Hajdari-Sport Ekspres/