Brajan Gruda është padyshim një rast për t’u treguar si model se rrugën e kujt nuk duhet të ndjekin talentet e rinj. Në një moment kur futbollisti nuk e kishte tërhequr ende vëmendjen e ekipit të parë të Gjermanisë, nisi të flirtonte pak me Shqipërinë. Flirtimi në këto kohë moderne është edhe nëpërmjet ndjekjes në rrjetet sociale. Gruda nisi të ndiqte faqen zyrtare të Federatës Shqiptare të Futbollit dhe Armando Brojës në Instagram. Kjo la të nënkuptuar se ky futbollist nisi të interesohej më tepër për Shqipërinë dhe për një kalim te Kombëtarja jonë.
Megjithatë në ditët e fundit, para nisjes së Europianit, qarkulloi lajmi se Gruda i është bashkuar ekipit të parë të Gjermanisë. Futbollisti shqiptar nisi stërvitjen me pancerat gjerman, por më pas duhej ta linte në mes stërvitjen pasi u dëmtua. Në këtë moment, pati një ndjenjë lumturie te shqiptarët që i treguan Grudës se kjo ishte një shenjë hyjnore se duhej të ndryshonte drejtim dhe të zgjidhte Shqipërinë. Ndoshta edhe për shkak të kësaj situate, Gruda ka zgjedhur që të shkëpus cdo lidhje me Shqipërinë, madje edhe ato të rrjeteve sociale, duke fshirë nga lista e personave që ndjek FSHF dhe Armando Brojën. /Sport Ekspres/
