Disa vite më parë, Messi vendosi të vazhdonte karrierën e tij në Amerikë, më saktësisht në fanellën e Inter Miami. Legjenda e Barcelonës ka shënuar 52 gola që kur u transferua në MLS në vitin 2023, dhe kontrata e tij me klubin aktual skadon në dhjetor të këtij viti. Negociatat në lidhje me zgjatjen e kontratës u zhvilluan, por papritmas lindi mundësia që Messi të transferohej në Arabinë Saudite.
Kështu, këtë mëngjes L’Equipe publikoi një “bombë”, duke pretenduar se Al Ahli kishte dërguar një ofertë që ai të bashkohej me ekipin e tyre. Ky ekip solli disa yje të mëdhenj si Riyad Mahrez, Roberto Firmino, Kessie, Edouard Mendy dhe Ivan Toney.
Ronaldo ishte lojtari i parë i madh që erdhi në Arabinë Saudite, në dhjetor 2022 kur nënshkroi për Al Nassr. Që kur mbërriti në Arabinë Saudite, Ronaldo është përballur me shumë risi, por një rregull ishte veçanërisht i çuditshëm për të. “Për shembull, në Evropë stërvitemi më shumë në mëngjes, dhe këtu stërvitemi pasdite, dhe nëse është Ramazan atëherë stërvitemi në mbrëmje në orën 10,” tha Ronaldo dhe vazhdoi.
“Është shumë e çuditshme dhe duhet kohë për t’u mësuar. Më pëlqen të jetoj për gjëra të tilla. Po, është e vështirë, por mësohesh me kalimin e kohës,” tha Ronaldo. /Elio Hajdari-Sport Ekspres/
