Për shumë, Premier League është liga më e mirë e futbollit në botë, por jo të gjithë janë entuziastë për atë që po ndodh në ishull. Kështu, mbrojtësi legjendar i djathtë Cafu vendosi të këshillojë lojtarët nga Brazili që të shmangin shkuarjen në Angli.
“Kam frikë. Gjithnjë e më shumë brazilianë do të luajnë në Premier League dhe kjo është arsyeja pse ka gjithnjë e më pak shanse që Brazili të fitojë Kupën e Botës në të ardhmen e afërt. Imagjinoni që mediat në Angli t’ju lajnë trurin çdo ditë sepse në mënyrë bombastike shkruajnë se jeni më i miri në botë, ndërsa në realitet nuk jeni as afër më të mirëve. Ajo që mediat në Angli u bëjnë lojtarëve është e trishtueshme dhe ata e kuptojnë, vetëm kur shkojnë në një ligë tjetër ku janë krejtësisht të ‘mbyllur’, kam frikë për Brazilin, sepse gjithnjë e më shumë lojtarë tanë po shkojnë atje dhe ju e shihni se çfarë shkruajnë për ta, edhe pse nuk është realiste.
Të gjithë i bashkohen ekipit kombëtar, edhe pse shumica nuk e meritojnë. Unë e kontrolloj më shumë La Ligën sepse aty kanë mentalitetin se çdo finale është e rëndësishme dhe fitimi i trofeut është e vetmja gjë që ka rëndësi. Ata nuk kanë njerëz që shkojnë para kamerave televizive dhe mediave për të thënë gënjeshtra sesi lojtarët në Spanjë janë më të mirët në botë dhe se nuk ka askund tjetër si ata, të gjithë vlejnë mbi 100 milionë euro, flasin për futboll atje, jo me fjalë boshe”, tha Cafu. /Elio Hajdari-Sport Ekspres/