Një ndeshje e pabesueshme ishte ajo mes Bylisit dhe Dinamos, e përfunduar në shifrat 1-0. Duket se Egbo do ta shoqërojë sërish fati që kishte më herët në Superiore teksa drejtonte Tiranën, të paktën në ndeshjen e sotme, mund të thuhet se është arritur një fitore hyjnore ku edhe fati kishte pjesën e tij, pa harruar edhe punën e madhe te vendasve.
Në minutën e 37 Dinamo do të shënonte me anë të Goudiaby, por mesfushori rezultoi në pozicion jashtë loje. Një tjetër gol iu anulua Dinamos në minutën e 81 teksa Qardaku shtyu topin në rrjetë, por me dorë. Maradona nuk funksionon me VAR.
E teksa mbërriti minuta e 90, Dinamo mori një penallti me shumë polemika. Një prekje e topit me dorë në zonën e ballshiotëve dhe pas shumë minutash rishikimi në VAR, u akordua penallti. Dejvi Bregu u nis për t’i dhënë fitoren Dinamos, por goditja ishte për t’u harruar dhe topi doli nga stadiumi. Në atë moment Bylis mori më shumë zemër dhe vetëm pak më vonë, arriti që të gjente golin në fund me Nascimento. Në fillim goli u akordua pozicion jashtë loje, por më pas ishte VAR që ndërhyri duke i dhënë fitoren Bylisit. Më poshtë gjeni intervistat e trajnerëve në “RTSH SPORT”:
Egbo: “Ne kemi luajtur mirë edhe kunër Tetuës. Puna jonë është që të krijojmë rastet dhe të dërgojmë sulmuesin para portës kundërshtare, pastaj është aftësi e sulmuesit. Për sa kohë ekzistojnë rastet tona për gol, jemi në rrugën e duhur. Kur mungojnë rastet, atëherë është problemi i madh. Por ne kemi pasur rastet tanë në dy ndeshjet e para. Duhet të shohim para, kjo fitore duhet të jetë si një faqe e re e historisë për ne pas humbjes me Teutën. Ndonjëherë është më mirë të luash më pak bukur si sot dhe të fitosh sesa të luash shumë mirë si ndaj Teutës dhe të dalësh me 0 pikë”.
Mehmeti: “Ky është futbolli, të jep emocione të pabesueshme. Të kesh një penallti dhe në fund të humbësh, të pësosh gol, ky është futbolli. Lojtarët ishin në shok për humbjen e penalltisë se ishin minutat e fundit, por këtu nuk ka justifikim. Dëshiroj që klubi të plotësojë grupin se kemi nevojë për përforcime. Unë i bëra të gjitha lëvizjet për ta fituar ndeshjen sot. Në pjesën e parë e vendosëm në rrezik veten, bëm disa gabime dhe Bylis po na kërcënonte, por në pjesën e dytë ishim shumë më lart se kundërshtari”.
