Medin Memeti është një prej lojtarëve që po cilësohet si një nga më të talentuarit që ka prodhuar ndonjëherë futbolli australian. Një arritje të madhe ka bërë ky lojtar që në moshën 17-vjeçare ka kaluar nga akademia e Melbournit në ekipin e parë. Madje në dy ndeshjet e fundit ka realizuar dy gola ku nga potenciali i tij i madhi, trajneri e ka aktivizuar si titullar në ekipin e parë.
Këtë besim, Memeti e ka shpërblyer duke shënuar në fitoren 2-3 ndaj Sydney, por njëkohësisht duke i dhënë fitoren skuadrës së tij 1-0 ndaj Central Coast në ndeshjen e fundit. Sa i përket pozicionit të tij, Memeti mund të luajë si sulmues i djathtë, si sulmues i majtë dhe njëkohësisht sulmues qendre.
Aftësia e tij më e madhe është nuhatja që ka me portën dhe instikti vrasës për të dërguar topin në rrjetë. Të jesh në vendin dhe kohën e duhur nuk është vetëm fat, është edhe aftësi, si dikur ka qenë Inzaghi i Milanit. Po kështu e ka nisur karrierën edhe Memeti që ndodhet gjithmonë aty për të dërguar topin në rrjetë në një moment të papritur.
Memeti është nga qyteti i alfabetit, Manastiri. Ai ka luajtur më parë me grupmoshat e Australisë, por FSHF e ka kontaktuar dhe përgjigja e marrë ishte shumë pozitive. Familjarët janë gëzuar nga lajmi se do t’i bashkoheshin Shqipërisë, por Melburni i nxorri disa probleme të vogla. Duke e parë si një talent të madh dhe duke ia vështirësuar punën e largimit drejt Shqipërisë U-19 prej nga erdhi ftesa, te Melburni u arsyetuan me faktin se Mehmeti sapo kishte luajtur me moshat e Australisë dhe se ky udhëtim ishte shumë i gjatë për të.
Por kjo pengesë nuk do të jetë për shumë kohë. Memeti mund të luajë për Australinë, për Shqipërinë dhe për Kosovën, por edhe në festën e fundit të golit, ai e tregoi saktë se askush nuk e ndalon dot që t’i bashkohet Kombëtares Shqiptare. Ai menjëherë ka festuar me shqiponjë pas dy golave të shënuara në dy ndeshjet e fundit, si për t’i treguar edhe klubit të tij se askush nuk e ndalon dot për të shkuar te Shqipëria. /Sport Ekspres/