Një ëndërr e bërë realitet. Shqipëria ka shkruajtur sot historinë, teksa për herë të parë ka siguruar një vend për në fazën “play off” të Kupës së Botës 2026. Misioni në Andorra është përmbushur me sukses. Kuqezinjve i ka mjaftuar goli i Asllanit në minutën e 67 për të mposhtur Andorrën me rezultatin minimal 0-1. Pas përfundimit të ndeshjes, lojtarët, trajneri dhe presidenti i FSHF-së kanë dhënë intervistat e tyre për mikrofonin e “Supersport”-it.
Silvinjo: “A mund t’i bënim zëvendësimet më përpara? Jo. Mendoj që jo. Broja? Bëra një mbledhje me stafin. Ishte një ndeshje e vështirë. Kjo është një skuadër e vështirë. Anglia i ka mundur 0-1. Barazoi 2-2 me Letoninë. Duhet t’i respektojmë. Jemi rritur shumë, por nuk jemi Gjermania që të fitojmë thellë. Pashë që Broja ishte pak i trishtuar. Nuk e di pse, është problemi i tij. Por çfarë nate e mrekullueshme. Kemi një ditë historike që mund të shijojmë një arritje në ‘play off’. I gjithë vendi duhet të festojë. 3 milionë shqiptarët në shtëpi dhe 6 milionë jashtë duhet të festojnë. Të gjithë punën e bëj për tifozët”.
Hoxha: “Ishte një ndeshje e vështirë. E dinim që Andorra do të luante kështu. Në 45 minutat e para ishte shumë, shumë e vështirë për të gjetur hapësira për të shpuar mbrojtje. Në pjesën e dytë rritëm edhe ritmin sulmues. Sa minuta luaj unë e vendos trajneri. Unë jam gjithmonë i gatshëm për Kombëtaren. Normalisht që do të doja të isha në formacion edhe ndaj Anglisë. Tani te klubi luaj çdo ndeshje dhe e kam rritur ritmin. Këtë fitore ia dedikoj të gjithë shqiptarëve anë e mbanë botës dhe të gjithë atyre që morën një rrugë të largët për të qenë këtu”.
Duka: “Asnjë nuk mund të mendonte që ka kundërshtarë të lehtë. Me Andorrën të gjithë ekipet e grupit tonë nuk e kanë pasur të lehtë. Anglia këtu ka fituar 0-1. Ngarkesa ekziston. Padyshim që ka presion. Mënyra se si u zgjidh tregon një profesionalizëm të mirë të skuadrës. M’u duk sikur ata kanë pasur më pak emocion. Unë kam pasur më shumë emocion në shkallët e stadiumit. Ndërsa lojtarët më të qetë. Patëm një mini-festë dhe thamë që tani duhet të shikojmë ‘play off’-in.
Nëse nuk impenjohesh, nëse nuk përqendrohesh, nëse nuk luan si skuadër, humb kundër Andorrës edhe kundër çdo kundërshtari tjetër. Jam shumë i sigurt që do të kemi një lojë shumë më të mirë ndaj Anglisë. A po e ndiqja edhe ndeshjen e Serbisë? Kam parë vetëm ndeshjen tonë. Gjatë gjithë ndeshjes kam qenë i përqendruar te ndeshja jonë. Kisha besim që Anglia do të fitonte kundër Serbisë. Kam pasur jashtëzakonisht shumë presion”./Sport Ekspres/