Vagjel Zguro beson ende te ngjitja në Superiore si kampion. Përmes një lidhjeje të drejtpërdrejtë me emisionin “Mega Sport” në “A2 CNN”, lojtari 32-vjeçar është shprehur se Pogradeci do ta përfundojë kampionatin e Kategorisë së Parë në krye të renditjes, pavarësisht diferencës prej 8 pikësh me Skënderbeun e vendit të parë. Ai ka shtuar se përvoja e Takajt si president nuk mund të jetë një faktor, pasi edhe në ekipin e Pogradecit ka lojtarë me mjaft eksperiencë.
“Në çfarë vendi del Pogradeci këtë vit? Kampion. Kampion në Kategorinë e Parë. Jemi 1 pikë larg Laçit të vendit të dytë dhe 8 pikë larg Skënderbeut të vendit të parë. Mbaje regjistrim këtë video dhe në fund të sezonit ma nxirr. Unë personalisht si lojtar kështu e kam besimin dhe kështu shpresoj që të dalë. Takaj ka eksperiencë? Ka eksperiencë Takaj, por ka lojtarë me eksperiencë pak më shumë se sa ekipi i Takajt. Edhe Egnatia nuk ka eksperiencë, por ka dalë dy herë kampione. Kush ka investim, ka eksperiencë në futbollin e sotëm”, është shprehur Vangjel Zguro./Sport Ekspres/
