Altin Lala është optimist për ndeshjet ‘play off’ të Kombëtares. Ish-mesfushori i Hanoverit, në një lidhje të drejtpërdrejtë me emisionin “Paso” në “Top Albania Radio”, ka thënë se Shqipëria i ka shanset për ta eleminuar Poloninë. Sipas tij, historia e polakëve nuk duhet të ndikojë negativisht për ekipin tonë kombëtar, pasi historia shkruhet dita-ditës me fitore.
“Unë e shoh shortin pozitiv. Poloninë e njohim. Kemi zhvilluar disa ndeshje dhe e kemi mposhtur. Kështu që, me shumë dëshirë dhe duke pasur një ditë të mirë jam i bindur që në Poloni do të kemi shanse ta eliminojme Poloninë. Edhe me penallti ndoshta. Polonia ka histori? Tani kemi filluar edhe ne të bëjmë histori. Historia shkruhet kur fiton. Kështu që ne duhet të fitojmë.
Levandovski është një golashënues që duhet ta kemi kujdes. Mbrojtja jonë ka funksionuar. Ne kemi pësuar shumë pak gola, vetëm ndaj Anglisë. Kemi shanse të mira.”, ka thënë Altin Lala./Sport Ekspres/