Shkëndija është një histori dhe formulë suksesi! Ekipi shqiptar po mban flamurin tonë duke vazhduar garën në Champions League, teksa sot luan ndeshjen e kthimit kundër Qarabag. Takimi i parë u mbyll në shifrat 0-1 në favor të miqëve, por gjithcka mund të përmbyset në transfertë.
Sido të shkojë historia, Shkëndija ka siguruar pjesëmarrjen në grupet e Conference League dhe njëkohësisht do të luajë për grupet e Europa League, në ndeshjen e Play Off. Një prej lojtarëve që ka spikatur më shumë te Shkëndija është portieri i Gambias, Baboucarr Gaye.
Ky i fundit ka marrë vëmendjen e shumë ekipeve në Europë dhe njëkohësisht të shumë mediave të njohura europiane për shkakun e disa super pritjeve të zhvilluara në ndeshjet e Europës.
Ky portier pritet që të vendos edhe një rekord për Shkëndijën si lojtari që do të transferohet dhe do të sjellë më shumë të ardhura në klub, një rekord që mbahet nga Visar Musliu i cili u shit për 450 mijë euro. E gjitha kjo tregon punën fantastike të Shkëndijës që merr “lojtarë të panjohur” në treg dhe më pas me këta futbollistë arrin deri në fazat më të largëta të Europës dhe tani ka filluar t’i shes për shifra shumë të larta për klubet shqiptare. /Sport Ekspres/
