Zakonisht jemi mësuar me shembuj dhe raste të njohur në botë dhe Europë, për ish-futbollistë të cilët blejnë ekipe futbolli. Një prej këtyre rasteve është padyshim ai i David Beckam te Inter Miami, ekip në të cilin luan edhe Lionel Mesi. Ndërkohë në emisionin “Procesi Sportiv”, Manushi ka zbuluar se të njëjtën rrugë do ta ndjek edhe Rei Manaj në Shqipëri.
“Moda e futbollistëve të rëndësishëm dhe të pasur që blejnë klube sportive ka arritur edhe në Shqipëri. Një futbollist i madh i Kombëtares është në tratativa për të blerë klubin e Lushnjës. Rey Manaj po blen ekipin e Lushnjës, duartrokitje për iniciativën. Ky model na duhet për të ecur përpara”, tha Ed Manushi.
Padyshim që kjo lëvizje është disi e çuditshme duke parë se Manaj nuk e ka mbyllur ende me futbollin e luajtur dhe ka vite përpara, por duket se kontratat e mira të firmosura në të kaluarën kanë bërë që Rei të hedh sytë edhe për investime të tilla. /Sport Ekspres/