Është mësuar sot finalisti i parë i Kampionatit Europian. Spanja ka mposhtur në Mynih Francën me rezultatin 2-1 dhe tashmë është vetëm një ndeshje larg trofeut. Francezët kaluan shumë shpejt në avantazh me anë të Kolo Muanisë, i cili gjeti rrugën e rrjetës në minutën e 9 të takimit.
Por ky gol i shpejtë nuk i shërbeu Francës për të marrë fitoren. Lamin Jamali mrekulloi stadiumin në minutën e 21-të. E majta e tij nga 25 metrat e dërgoi topin në trekëndësh dhe ktheu sërish baraspeshën. Ky gol erdhi edhe me një rekord nga pas për Jamalin, i cili tashmë është lojtari më i ri që ka shënuar gol në historinë e një Europiani.
Vetëm 4 minuta më vonë spanjollët përmbysën rezultatin. Dani Olmo tregoi klasin në zonë, ku me një prekje nxorri jashtë loje mbrojtësin kundërshtar dhe goditi më pas portën. Topi i devijua nga Kunde, që e shtyu drejt rrjetës së tij. Rezultati mbeti i pandryshuar deri në fund të 95 minutave, duke e dërguar kështu Spanjën në finalen e 14 korrikut./Halit Delibashi-Sport Ekspres/