Rei Manaj pritet të ndërrojë skuadër në këtë merkato dimërore. Sipas medias “Fanatik”, Trabzonspori kërkon të transferojë sulmuesin shqiptar, i cili e ka bërë të ditur publikisht faktin se ka mbetur i pakënaqur me mënyrën se si u trajtua nga Sivaspori. Ndërkohë gazetari Hasan Tuncel ka nxjerrë në dritë një kusht të veçantë të kontratës së Manajt.
Nëse lojtari i Kombëtares kuqezi luan 20 ndeshje me Sivasporin, atëherë kontrata e tij do të zgjatet automatikisht. Një kusht që nuk i ka lënë një shije të mirë Rei Manajt, i cili ka kërkuar nga klubi që të vlerësojë ofertat që kanë mbërritur për të.
“Ka një kusht në kontratën e Rei Manajt që nëse ai luan 20 ndeshje, atëherë kontrata e tij do të zgjatet automatikisht edhe për një vit tjetër. Për këtë arsye lojtari nuk dëshiron të vazhdojë në Sivaspor dhe dëshiron që t’i vlerësohen ofertat”, ka bërë me dije Hasan Tunceli./Sport Ekspres/
