Në Serbi është mbajtur sot Kongresi i UEFA-s, teksa në Beograd janë ulur në tryezë të gjithë krerët e Federatave të Futbollit të shteteve europiane. Ndërkohë në fjalimin e mbajtur nga kreu i vetë UEFA-s, Ceferin, slloveni theksoi se Shqipëria dhe Serbia kanë treguar një shembull të madh se futbolli nuk ngelet peng i historisë dhe se në vazhdimësi zgjidhja është vetëm rruga e paqes, jo ajo e konflikteve.
“Futbolli është më shumë se një sport: është një pasqyrë dhe një model i shoqërisë. Ai flet një gjuhë universale që kalon përtej kufijve, bashkon komunitetet dhe frymëzon ëndrra dhe për këtë arsye, ne e shohim turneun e finaleve të EURO U-21 2027, që do të zhvillohet në Shqipëri dhe Serbi, si një rikujtesë të shkëlqyer se nuk ka kufij në futbollin europian. Futbolli është më shumë se historia e së shkuarës, është e ardhmja që ne po ndërtojmë dhe po e ndërtojmë së bashku”, tha Presidenti i UEFA-s, Aleksander ?eferin.
Por një ditë përpara këtij kongresi, në mesin e shumë flamujve që valëviteshin në Beograd, ishte edhe ai i Kosovës. Për herë të parë nga futbolli, Serbia njohu zyrtarisht Kosovën duke vendosur flamurin e asaj si një shtet më vete, duke e pranuar këtë fakt, ndryshe nga më parë. Këtu merr përgjigje edhe teza e shtruar se organizimi i Shqipërisë me Serbinë jo vetëm që nuk ishte kundër Kosovës, por lobimi i madh i bërë edhe nga kreu i FSHF dhe zëvendës presidenti i UEFA-s, Armand Duka, bën që serbët për herë të parë të vendosin edhe flamurin e Kosovës.
Megjithatë mënyra sesi u paraqit e gjitha kjo, shkaktoi trazira të mëdha në Serbi. Kreu i Federatës së Futbollit të Kosovës, Agim Ademi, ftonte një person që po filmonte gjithë skenën duke treguar flamurin e Kosovës disa herë me buzëqeshje në sallën e Beogradit dhe më pas duke larguar. Kjo sjellje e Ademit është marrë si një provokim i rëndë në Serbi, që përveç faktit që duhej të përtypnin që për herë të parë një institucion i tyre pranoi Kosovës, në këtë rasat futbolli, tani duhej të përtypnin edhe këtë video që po bën xhiron e botës duke ditur konfliktin e madh. Huliganët e Crevena Zvezdës kanë reaguar të parët duke arritur të futen në sallën e Kongresit, për të marrë flamurin e Kosovës dhe më pas i kanë vendosur flakën. Një akt i turpshëm i serbëve, por një rast ky që mund të evitohej fare lehtë nëse nuk do të qarkullonte ajo video në rrjetet sociale dhe gjithçka historike ndodhi në Beograd, mund të ilustrohej me pamje pas mbarimit të Kongresit. Nga dëshira e madhe për të treguar fitoren, përpara kohe, pasoja është sjellja e turpshme e bërë nga huliganët e Zvezdës, por tërësisht e pritshme. /Sport Ekspres/