Barcelona u tregua pa mëshirë kundër Real Madridit duke e shkatërruar në finalen e Superkupës në shifrat 5-2. Pas fitores 4-0 në ndeshjen e parë të këtij sezoni, Hansi Flick i dha një tjetër leksion Anceloti-t. Ndërkohë në këtë përballje shkëlqeu sërish Yamal, me një tjetër super performancë. Por sjellja e tij jashtë fushe lë shumë për të dëshiruar dhe tregon saktësisht vitet e tij të pakta, nëse në fushë diferenca e moshës nuk duket aspak.
Një fëmijë i vogël i veshur me fanellën e Real Madridit ka kërkuar që të ketë një foto me yllin e Barcelonës. Ky i fundit është afruar dhe e ka përqafuar, por më pas ka mbuluar me dorë stemën e Real Madridit në fanellën e veshur nga djaloshi. E gjitha kjo skenë ka marrë shumë komente negative për Yamal, ndërsa yje si Cristiano Ronaldo janë munduar të shmangin shkeljen e stemës së Atletiko Madridit apo Barcelonës në kohën që futeshin për në dhomën e zhveshjes pas mbylljes së pjesës së parë apo ndeshjes kundër kundërshtarëve të përjetshëm. /Elio Hajdari-Sport Ekspres/
