Edon Zhegrova ishte një nga lojtarët e shumëpërfolur të kësaj merkatoje vere. Emri i tij u lidh me ekipe si Napoli, Milani e së fundmi Marseja, por duket se asnjë prej tyre nuk do të jetë e ardhmja e sulmuesit shqiptar. Presidenti i Lille-s ka thënë së fundmi në konferencë për shtyp se Edoni po stërvitet mirë me skuadrën dhe është i uritur për sezonin e ardhshëm. Pavarësisht moszgjatjes së kontratës, e cila përfundon verën e ardhshme, Leitang konfirmon se Zhegrova do të qendrojë te Lille edhe këtë sezon.
“Edoni është këtu. E pashë këtë mëngjes, në fakt, shihemi pothuajse çdo ditë. Është e mundur që ai të jetë me ne (këtë sezon). Ai po bën mirë, po stërvitet mirë, është rikthyer mirë. Është e mundur që ai të rifillojë stërvitjen me ekipin profesional nga e hëna dhe se mund të mbështetemi tek ai për këtë sezon. Ne menduam se ai mund të largohej në një moment. Mendoj se sot kushtet nuk janë domosdoshmërisht të përshtatshme që ai të jetë në gjendje të largohet. Dhe po themi se në vend që të kërkojmë dikë jashtë, kemi dikë që është këtu, në shtëpi, që po bën mirë.
Pakti me të, nëse kthehet në ekipin profesional, është se ai mund ta bëjë sezonin me ne. Ai është i uritur, i mungojnë ndeshjet, konkurrenca, është një djalë që ka talent absolutisht të jashtëzakonshëm. Kemi folur për zgjatjen e kontratës së tij për muaj të tërë. Do të më kishte pëlqyer shumë që Edoni ta zgjaste kontratën me ne. Kjo nuk ndodhi”, ka deklaruar Olivier Leitang./Sport Ekspres/