Erald Maksuti është padyshim një prej talenteve më të mira të prodhuar nga Superiorja dhe pritshmëria është maksimale mbi këtë lojtar. Shumë pritet prej tij dhe futbollisti në fjalë e ka bërë hapin e parë të madh, kaloi nga Flamurtari te Akhmat Grozny. Një kontratë e firmosur për 4 vite, ndërsa në një intervistë me Drilon Xhepollarin, në Kubi Sportiv që transmetohet në EuroNeës, Maksuti, ka dhënë rrëfimin e tij të parë.
“Kishim disa kohë që flisnim për të gjetur një akord me Akhmat, kanë përshtypje të mirë për lojtarët shqiptarë. Ia arritëm mbylljes së marrëveshjes dhe jam shumë i lumtur. Më bindi projekti dhe fakti që i duan shumë lojtarët shqiptarë, prandaj erdha këtu. Odise Roshi më dha këshilla për këtë ekip. Objektivi im është që të luajë mirë tani me Shpresat dhe më pas të kaloj te Kombëtarja A. Flamurtari? Më vjen keq që nuk arritëm dot qëllimin tonë, në Vlorë e përjetojnë shumë futbollin si në Shkodër. Uroj që situata të rregullohet dhe Flamurtari të kthehet aty ku i takon. Vllaznia për kampion? Pritshmëritë ishin shumë të mëdha, por tani të gjithë e dimë se titulli është në duart e Egnatias, i mjafton vetëm një fitore në ndeshjen e fundit”, tha Maksuti. /Sport Ekspres/