Edon Zhegrova vazhdon të jetë temë diskutimi te Juventusi. Talenti shqiptar së fundmi ka shënuar dy gola dhe ka dhënë një asist për bardhezinjtë. Paraqitjet e fundit kanë rihapur debatet nëse sulmuesi Kosovës duhet të marrë më tepër minuta te gjiganti i Serisë A.
Fabricio Ravaneli, në një ndërhyrje në podkastin në “Youtube” të “Tuttosport”-it, i ka dalë në mbrojtje Zhegrovës. Ish-sulmuesi i Juventusit ka thënë se ka një dobësi për Edonin. Ai jep edhe këshillën e tij për mënyrën se si lojtari shqiptar duhet trajtuar. Sipas Ravanelit, Edon Zhegrova ka nevojë për më tepër liri.
“Gjithmonë kam pasur një dobësi për Zhegrovën. Shpesh kam diskutuar me Spaletin rreth mënyrës se si e aktivizon atë. E njoh mirë trajnerin dhe e di se ai është një forcë e vërtetë (në kuptimin pozitiv) me lojtarët e tij. Por ky është një lojtar që ndonjëherë duhet lënë pak më i lirë. Ai ka cilësi të jashtëzakonshme dhe një forcë që duhet t’i bëjë të gjithë ta falin kur, herë pas here, bën gabime ose nuk angazhohet sa duhet në mbrojtje.
Nëse Zhegrova e humb shpesh topin, kjo ndodh sepse ai rrezikon vazhdimisht në lojën e tij. Ai dëshiron të jetë vendimtar. Në Serie A shoh kaq shumë lojtarë që e marrin topin dhe e kthejnë atë prapa. Edhe unë mund të luaja kështu në moshën 58-vjeçare…”, ka thënë Fabricio Ravaneli./Sport Ekspres/