Një vendim fantastik ka ardhur për Tiranën nga Komisioni i Disiplinës. Pas ngjarjes së ndodhur në ndeshjen me Vllazninë, u vendos që bardheblutë të mbeteshin pa tifozë deri në fundin e kampionatit. Megjithatë sipas vendimit të fundit, pas apelimit që është bërë nga kryeqytetasit, dënimi ekstrem për Tiranën hidhet poshtë dhe bardheblutë do të kenë mundësinë që të shohin sërish tifozët e tyre që nga ndeshja me Partizanin. /Sport Ekspres/
Komisioni i Apelit pasi mori në shqyrtim ankimin e Klubit të Futbollit Tirana,
Vëren se:
Me vendimin nr.13, pika 1 datë 01.11.2024 Komisioni i Disiplinës dhe Etikës ka vendosur të marrë kundrejt KF Tirana, masat disiplinore si më poshtë vijon:
KF Tirana, për sjellje të gabuar të spektatorëve, duke hedhur sende në fushën e lojës dhe duke mos garantuar sigurinë e lojtarëve të ekipit mik, në bazë të neneve 6/3/b, 8/1, 17/1, 17/2/b, 17/2/c dhe 17/2/h të KDE, dënohet me gjobë në masën 300.000 (treqind mijë) lekë dhe zhvillimin pjesës së mbetur të ndeshjeve të sezonit futbollistik 2024-2025 pa spektatorë.
Më datë 09.11.2024 KF Tirana, ka paraqitur ankim me objekt:
- Rrëzimin e Vendimit13, pika 1 datë 01.11.2024 të Komisionit të Disiplinës dhe Etikës.
Komisioni i Apelit të Disiplinës dhe Etikës pasi u njoh me relacionin e Sekretariatit Teknik, dogjoi përfaqësuesit e Klubit të Futbollit Tirana, shqyrtoi dokumentacionin e paraqitur dhe diskutoi çështjen në tërësi si dhe duke u bazuar në nenet 65 e vijues të Kodit të Disiplinës dhe Etikës,
VENDOSI:
- Lënien në fuqi të masës së dënimit me gjobë në masën 300.000 (treqind mijë) lekë.
- Ndryshimin e pjesës tjetër të vendimit duke vendosur:
- Dënimin e Klubit të Futbollit Tirana për zhvillimin e të 8 (tetë) ndeshjeve pa spektatorë.
- Pezullimin e pjesës së mbetur të dënimit prej 5 (pesë) ndeshjesh.
- Pezullimi i dënimit revokohet nëse gjatë periudhës së provës KF Tirana kryen një shkelje tjetër të natyrës dhe rëndësisë së ngjashme.
- Periudha e provës do të jetë deri në përfundim të sezonit futbollistik 2024-2025.
- Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.
